Dingdung de na jawng ma ni

Nog Mung kaw internship de laika sharin hpang wa ai bat lahkawng rai sai.Ngai na gawp kaw music sharin na matu Black Board n tsa kaw do,re,mi,fa,so,la,ti,do nsi note hpe ka dat ai ….Jawng ma ni ngai ka dat ai hpe hkan ka na matu laika bot ni shaw taw nga ma ai…N myit mada ai sha jawng num shayi a laika bot hpe yu hkrup ai …..laika bot gaw kachyi mi ding sa taw nna hkayawp hkang ni mung laika pi je na daram bin taw nga sai….dai laika bot hpe galam dat ai shaloi ..laika pa ni kaw nsi note ni , sin praw , sin na n sen nga ni, KBC kaw na shapraw da ai Music level 1 a chapter 1 kaw na chapter 5 du hkra ka taw da ai hpe ngai mu lu ai….Sara galaw ai ngai pi hpa nka shi yang …dai num sha laika bot kaw chapter 5 du hkra ka da ai hpe yu na ….myit kaw myu mi hkam sha nna mau mat ai….dai hte ….ngai na myit kaw san mayu ai myit rawng wa ai hte " nang ndai laika ni hpe gara kaw na yu ka da ai rai ? " ngu dai num sha hpe san dat ai …dai num kasha mung " Lai wa sai , lahkawng ni daram kaw Internship hpung ni sharin ya ai kaw na hkan ka da ai re " ngu ..gaya ai myi man hte bai htai ai ..
Shi dai hku htai dat ai hte …..laiwa sai lahkawng ni daram kaw anhte hta pang lahkawng ning kaba ai hpu shawng ,hpu ba jawng ma ni Nog Mung de internship kalang sa ai hpe dum dat ai …aw …dai rai yang dai shayi sha na laika bot gaw laiwa sai lahkawng ning kaw na rai nga ai….matsan dum sai hku re…ya du hkra dai laika bot hpe naw lang taw nga ai …kaga jawng ma ni hpe shan hte n chye hkra hkan sagawn yu shaloi kaga ni mung dai shayi sha zawn sha re…anhte jaw ai laika bot nnan hta lai nna …yawng ngu na daram gaw moi ding sa laika bot hpe sha matut lang taw nga ai ….Lawu ga kaw shata lahkawng hta laika bot lahkawng ,laning mi hta laika bot 6 daram galai lang taw nga shaloi….Nog Mung kaw na jawng ma ndai ni gaw lahkawng ning raitim laika bot langai hpe sha naw lang ra taw nga ai…..lahkawng ning daram kaw laika bot langai n ma ai gaw hpa na rai ? grai lu zing da ai majaw kun ? jawng n lu lung ai majaw kun? jawng kaw laika nsharin na i? jawng sara n nga na i? laika bot hpe manu shadan na i? laika bot mari na gumhpraw ma tsan na kun?.....dai lam ni hpe yu jang Nog Mung kaw na ni laika hpaji hte seng na grai naw gawng kya taw nga ai hpe mu mada ga ai …Myo langai re ngu ..Myen asuya ni matsing da ya tim..laika hpaji madang gaw mare langai zawn grai naw nem nna ra rawng gawng kya taw nga ai …matut na mu lu ai gaw …laika bot mari na pi grai yat hkat jamjau taw nga ai Wunpawng myu sha jawng ma ni re ngu hpe mung mu mada ga ai…..
Ndai laika hpe hti nga yang Nog Mung kaw na jinghpaw wunpawng myu sha jawng ma ni a hpaji lam hpe myit yu matsan dum nga ai shaloi…ngai gaw….Jinghpaw mung daw buga ni rai nga ai …Chihpwi , Bamaw, Danai,Sadung , Hpa Kan maga de na… mare kaw nga ai …laika n lu sharin ai sha yak hkat jam jau ..hkau na pa kaw sha mu galaw ra nga ai …Jinghpaw Wunpawng ramma ni hpe myit yu nna matsan dum nga ga ai law…..

zila ...May 20 2009 12:30 AM